top of page

舍堂快報 #3


國賢慈善環島單車

[一步]

發覺而家越嚟越多人會問,點解要住Hall? 呢個問題,呃,其實我都唔係幾識答。因為 ,每個人嘅答案都唔同, 可以係為左脫離屋企,為左打波join teams攞旗,為左識朋友,為左試新野,為左玩,為左近啲返學etc。幾新奇有趣嘅原因喺呢幾年都真係都聽唔少。入Hall既理由形形色色,又或者其實根本就唔需要一個理由,重要嘅係喺住Hall既過程中,得到啲咩,做到啲咩。拖篋離開Hall既一日,會唔會覺得自己比入嚟嘅時候長大左?

有啲住緊Hall既人,可能會成日問自己,我可以喺呢間hall做啲咩?我可以為呢間hall做啲咩?你可能會覺得自己做到嘅野好微不足道,踏出幾多步都好,都帶唔到啲咩改變,但真係咁咩?

最近,可能大家都有聽過下我地Hall嘅Fund Raising Cycling(FRC)環島單車呢樣野。一開始,十一年前,我地某一層樓嘅某一個超仙忽發其想,想搞個樓活動團結下樓兄弟,突破下自己,又順便做下運動咁,就同左佢層樓去左踩單車環島。自此,每年嗰一層樓都會去踩環島。過左三年,有啲街外人知道咗有呢個活動,竟然主動問可唔可以參加。由嗰一年開始,FRC慢慢變成一個一年一度既慈善活動,亦由一個樓活動,變成一個全Hall總動員既活動。

由廿零個人(2005)去到一百六十人(2008)再去到一千人(2016),我相信嗰位超仙亦從來冇諗過自己踏出嘅一小步,竟然會變成一件咁大嘅事,甚至乎幫到呢個社會入面好多有需要嘅人。

或多或少,我地都曾經踩過FRC,pre過trip,做過Helper。踩環島雖然好辛苦,中間亦會諗過不如踩到去太安樓食完個宵就返轉頭算啦,但同組員,樓兄弟姊妹,OC一齊踏過呢三十六公里,一齊推上長命斜,一路推住架車一路睇星星,再喺落斜位一齊衝落去。逆風而上,順風而落,風馳電制嗰種感覺,呢啲共同經歷,呢一世都唔會唔記得。雖然每個人程度唔同,速度有快有慢,但大家向住同一個目標進發,互相支持大家,最後一齊到達終點,呢個唔係就係Hall life既縮影咩?

可以透過一件咁熱血嘅事做善事,係幾咁難得。而亦因為有呢啲經歷,對我地嚟講,可以以李國賢堂堂友既身分去搞FRC,令更多人可以參與咁有意義既事,更加多有需要既人可以被幫助,係一件值得自豪嘅事。我地嘅一步,就係傳承,然後推廣,令環島單車可以一直搞落去,令更加多人認識環島單車。可能睇落真係好細步,但當中對我地同埋被幫助嘅人嘅意義比一切都大,而最後做到嘅,唔知架,可能比而家想像嘅都多。

你呢?你踏出既一步係咩?如果唔試,你永遠唔知終有一日條路可以行到幾遠。

國賢慈善環島單車籌委 2017 Fund Raising Cycling Organizing Committee 2017


係Facebook搵我地啦
Find us on Facebook
新鮮出爐 Newest
​主題 Categories
bottom of page