舍堂快報 ＃1

Round the Island Run “由香港大學聖約翰學院 (St. John’s College, The University of Hong Kong) 所舉辦的第三十二屆環島跑 (Round The Island) 於五月一日凌晨圓滿舉行。環島跑，顧名思義就是圍繞香港島跑一圈，由聖約翰學院出發，經西環、銅鑼灣、柴灣、大潭、淺水灣、香港仔，最後返回聖約翰學院，全長約三十八公里。 有別於一般馬拉松，環島跑 RTI 是聖約翰學院首創的傳統，亦是全港第一個有規模地環著香港島跑的活動。聖約翰學院的宿生將年復一年地接受此挑戰；而亦會有舊生回來參與，共享這份「回甘」。” 環島跑應該係每一個莊民一世都唔會唔記得嘅經歷，因為真係好chur， 係真係好_chur。 入聖莊之前聽過每一個一二年仙都要跑，不論你係運動健將定係弱質纖纖平時路都唔行嘅人，只要你住得係到就要跑。38km 乘2姐係76km，我懷疑我一世人都無行過咁多路，差啲連hall都未入迎新都未過就quit hall。第一年嘅時候由一個禮拜之前開始驚，同年仙日日攬埋一舊祈禱希望跑完仲有命考final同打freshman tourn。然後一眾大仙合力將環島跑妖魔化，不斷描述大潭長命斜有幾斜過完海洋公園仲有幾遠。恐怖程度令某細仙係練完早波食緊飯嘅時候，自己諗下諗下喊咗出嚟。完咗環島跑之後條巷會突然嘅出現無數嘅碌碌凳，沖涼格各放一張膠櫈，外加外賣訂單不斷。偶爾見到有行到嘅人應該都要伸到隻腳好似筷子咁直先行到，如果大家有幸目睹跑完之後一日有人行82嘅樓梯，不妨睇下佢用咩步姿同要用幾耐。 跑之前每個人都要寫低自己嘅目標，目標不外乎 「生存」「唔好死」「唔好包尾」等等。開始前用噴漆噴上自己所在樓層同隊伍嘅logo，釘上螢光膠帶，最後以同年仙用marker寫上嘅加油留言作戰衣嘅點綴就準備好可以出發。 長跑某程度上係寂寞嘅，因為好多時候都係得你自己一個，無論你隻腳有幾痛有幾辛苦得你自己知。沿路你會遇到好多人，可能係你嘅樓兄弟樓姊妹，又可能係一個你平時只係會打聲招呼嘅人。但好似住hall咁，其實大家都係為咗同一個目標前進。一個眼神，一句加油就可以令你嘅隊友堅持到下一個checkpoint。假如你可以遇到同你差唔多速度嘅人係一種幸運，假如同佢可以一齊跑完全程係一種承諾。 第二年，相約樓同年仙一齊跑話無論點都好行都要行完，點知佢係柴灣就暈咗。但去到下一個checkpoint竟然見到佢係度等我；從來無諗過唔做運動嘅佢可以咁堅持，因為佢大有藉口可以係柴灣就retire。 「我應承咗你，無論係點我都會同你一齊跑完。」 第二年比第一年更難跑，因為你知道條路有幾長，跑緊嘅時候你會無數次質疑自己會唔會完成唔到，望著身旁暈咗起番身都繼續跑嘅同年仙，又望住其他人抽住筋用藥膏搽滿小腿都繼續跑落去，我好似冇資格放棄。 「路縱難行，同路有人。」 其實呢個一場不問體能只問毅力嘅戰爭，因為大部份人跑到柴灣嘅時候已經冇乜奶，係停係原地諗住退場，定係咬緊牙關跑落去係你自己嘅選擇。點樣支持隔離嗰個，點樣令自己唔好放棄，每個人都有自己嘅一套，你可能會覺得寂寞但你絕對唔係孤身一人。啲大仙話環島跑就好似住聖莊咁，係好chur係好辛苦，但你連38km都跑到有咩做唔到？之後每次遇到咩困難嘅時候諗返起，原来好多嘢你比你自己認為有更多嘅能力更可以堅持。 強烈推薦友堂嘅各位有機會挑戰自己，跑一次。 Mip 01/05/2016